கனடாவில் 1.26 லட்சம் டொலர் மதிப்பிலான போதைப்பொருட்கள் மீட்பு

கனடாவின் விக்குவெம்காங் (Wiikwemkoong) பகுதியில் நடத்தப்பட்ட அதிரடி சோதனையில், போதைப்பொருள் கடத்தல் மற்றும் சட்டவிரோத ஆயுதங்கள் வைத்திருந்தது தொடர்பாக ஒரு இளைஞர் உட்பட நான்கு பேரை காவல்துறையினர் கைது செய்துள்ளனர்.

விக்குவெம்காங் பழங்குடியின காவல் சேவை, ஒன்டாரியோ மாகாண காவல்துறை மற்றும் UCCM காவல் பிரிவினர் இணைந்து இந்தத் தேடுதல் வேட்டையை நடத்தினர்.

இந்த சோதனையின் போது கொக்கைன், கிராக் கொக்கைன், ஃபெண்டானில் மற்றும் சட்டவிரோத மருத்துவ மாத்திரைகள் என சுமார் 1,26,000 டொலர் மதிப்பிலான போதைப்பொருட்களைப் போலீசார் பறிமுதல் செய்துள்ளனர்.

போதைப்பொருட்களுடன் சேர்த்து, 20,000 டொலருக்கும் அதிகமான ரொக்கப் பணம் மற்றும் இரண்டு கைத்துப்பாக்கிகளையும் காவல்துறையினர் கைப்பற்றியுள்ளனர்.

இதில் ஒரு துப்பாக்கி தோட்டாக்கள் நிரப்பப்பட்ட நிலையில் இருந்ததாகத் தெரிவிக்கப்பட்டுள்ளது.

இந்தச் சம்பவம் தொடர்பாக விக்குவெம்காங் பகுதியைச் சேர்ந்த 41, 21 மற்றும் 38 வயதுடைய மூன்று பெண்கள் மற்றும் ஸ்கார்பரோ (Scarborough) பகுதியைச் சேர்ந்த 18 வயது இளைஞர் ஒருவர் மீது போதைப்பொருள் கடத்தல் மற்றும் ஆயுதக் குற்றச்சாட்டுகள் பதிவு செய்யப்பட்டுள்ளன.

இவர்கள் அனைவரும் நீதிமன்றத்தில் ஆஜர்படுத்தப்படும் வரை காவலில் வைக்கப்பட்டுள்ளனர்.

மேலும், போலீசாரின் பணிக்கு இடையூறு விளைவித்த குற்றத்திற்காக 27 வயது பெண் ஒருவரும் கைது செய்யப்பட்டு பின்னர் விடுவிக்கப்பட்டார்.

சமூகத்தின் பாதுகாப்பிற்கு அச்சுறுத்தலாக விளங்கும் போதைப்பொருள் கடத்தல் மற்றும் சட்டவிரோத ஆயுதப் புழக்கத்தை ஒருபோதும் பொறுத்துக் கொள்ள முடியாது என்று விக்குவெம்காங் காவல் துறைத் தலைவர் ரான் கிஞ்ஞாக் (Ron Gignac) எச்சரித்துள்ளார்.