ஏர் கனடா விமான விபத்தில் விமானிகள் இருவர் பலி; பலர் படுகாயம்

 நியூயோர்க் நகரில் ஏர் கனடா விமானம் ஒன்று விபத்துக்குள்ளானதில், விமானிகள் இருவரும் உயிரிழந்ததுடன் பலர் படுகாயமடைந்துள்ளதாக தகவல்கள் வெளியாகியுள்ளன.

கனடாவின் மொன்றியலில் இருந்து இன்று அதிகாலை நியூயோர்க்கில் உள்ள LaGuardia (லாகார்டியா) விமான நிலையத்தை வந்தடைந்த ஏர் கனடா விமானமே விபத்தில் சிக்கியுள்ளது.

விமானம் ஓடுபாதையில் தரையிறங்கிய போது, எதிர்பாராத விதமாக குறுக்கே வந்த ட்ரக் (Truck) ரக வாகனம் ஒன்றுடன் பலமாக மோதியுள்ளது.

இந்தக் கோர விபத்தில் விமானத்தின் தலைமை விமானி மற்றும் துணை விமானி ஆகிய இருவரும் சம்பவ இடத்திலேயே உயிரிழந்துள்ளதாக தெரிவிக்கப்படுகின்றது.

விபத்தில் விமானத்தில் பயணித்த பல பயணிகள் படுகாயமடைந்த நிலையில் மீட்கப்பட்டு, சிகிச்சைக்காக அருகில் உள்ள மருத்துவமனைகளில் அனுமதிக்கப்பட்டுள்ளனர்.

இந்நிலையில் விமானம் தரையிறங்கும் வேளையில் ஓடுபாதையில் ட்ரக் ரக வாகனம் எவ்வாறு குறுக்கே வந்தது என்பது குறித்து விமான நிலைய பாதுகாப்புப் பிரிவினர் மற்றும் விமானப் போக்குவரத்து அதிகாரிகள் தீவிர விசாரணைகளை முன்னெடுத்து வருகின்றனர்.